مشروع رز باللبن وتوزيعة علي المحلات

السلام عليكم ورحمة الله وبركاتة
الحمد لله رب العالمين والصلاة والسلام علي رسول الله محمد صل الله علية وسلم

انهاردة بفضل الله
اول مرة في حياتي انجح في عمل رز باللبن قي الفرن

المشروع دة جميل جدا
سالت ناس كتير

قالوا ان المقادير
10 كيلو لبن
كيلو رز
كيلو سكر


المهم التجربة الي انا عملتها

كيلو لبن   وكوب رز

1- جبت كوب رز في حلة  ووضعت علية كوب وربع ماء   وسلقت الرز
حوالي 5 دقائق شوية علي العالي وبعد كدة وطي النار
المهم الرز يشرب الماية  وتكون مغطي الحلة

2- في الناحية التانية تكون بتغلي اللبن  واول لما يغلي تطفي

3- زود اللبن المغلي  علي الرز بعد ما سلقناة والرز شرب مايتة

بيستوي في حوالي من نص ساعة ل تلات اربع ساعة
اهم حاجة 
اهم حاجة 
اهم حاجة 
وطي الناااااااار بقي خلاص ومتضعش غطا علي الحلة 

واستمر كل 5 دقائق في التقليب  
لحد ما هتلاقي الرز شرب اللبن
4- في الأخر خالص زود السكر  انا وضعت 5 ملاعق سكر كبار

ملحوظة الرز باللبن ميزتة انة يكون سكرة هادي

5- الحتة الجديدة  بقي
هات اطباق فويل من اي محل بيبيع أكياس
وبعد ما الرز باللبن استوي
عبي اطباق الفويل

وضعهم بالفرن  حوالي ربع ساعة علي العالي

هياخد وش ولون جميل  وطعم حكاية

6- بعد ما يبرد خالص  ادخل علي التلاجة يا معلم وادعولي

طبعا ممكن تعملوة في البيت للي بيحبوة ولزوجك او اولادك

وممكن تعملية كمشروع
اطباق فويل وتغطيها
وتعرضي الرز باللبن علي محلات  السوبر ماركت

بالنسبة للي عاوز يتخصص في المشروع  محتاج حاجات كتير
اتفقنا مواد خام
سكر رز   يكون عندك غاز طبعا وبوتوجاز

ومكان لتجهيز الرز باللبن اودة في الشقة او مكان إيجار

وهتحتاج حد يوزع معاك لو مش هتوزع بنفسك
يكون معاك فذبة او موتسكيل او عربية
ولو حد وزع معاك بتتفق معاة علي نسبة

جزئية مهمة الأاوراق لو عاوز تمشي قانوني  والموضوع كبر ونجح معاك
بتعمل بطاقة ضريبية وسجل تجاري

وتتفق مع اي مطبعة يطبع لك كروت الي بتغطي بيها طبق الفويل الرز باللبن

وختم بتختم بية تاريخ الصلحية  وبيبقي مطبوع علي الغطا الصاحية مثلا ثلاثة ايام من تاريخ الإنتاج

بالتوفيق يارب للجميع

جزاكم الله خيرا
والسلام عليكم ورحمة الله وبركاتة
اخوكم الصغير

#سمير-محترم